Robòts securitaris

A Nantas, lo 9 de decembre de 2020, un canhàs jaune, claufit d’electronica, naut sus sas patas de metal, se passejava sus una plaça, al mièg dels anants : èra lo robòt-canhàs «Spot», concebut per una entrepresa americana. Se fasián los primièrs ensages en Euròpa, d’aquel robòt-canhàs cargat de cameràs, de detectors de movement e comandat a distància. La primièra utilizacion d’aquel robòt, segond los conceptors, es «la susvelhança e la reconeissença en terrenc ostil».

Aquel robòt patrolhava, pendent lo primièr confinhament, dins un pargue de Singapor per far respectar la distanciacion fisica. Equipat d’una camerà capabla d’avalorar lo nombre de personas dins lo pargue e la distància entre elas, lo canhàs bramava un messatge per rampelar los gèsts barraduras e far respectar la distanciacion fisica.

Lo robòt, menat a distància e intelligent a l’encòp, pòt navegar dins environaments complexes, evitar los obstacles, pujar un escalièrs, se dobrir una pòrta. Es ja utilizat per la polícia de Nova York per reconéisser de luòcs e los securizar abans l’intrada de la polícia.

D’autres robòts, emetor d’ondas a ultrà-violets capablas de tuar bacterias, micròbis e virusses son utilizats, ara, per desinfectar luòcs publics.

Pel primièr còp dins una estacion, a la de sant Pancràs a Londres, se passeja entre los viatjaires una mena d’auto-lavaira que projècta sul sòl los rais netejaires.

Los sonhants d’un espital brusselés, que i utilizèron lo robòt netejaire pel primièr còp per descontaminar las crambas, dison qu’aquò permet de las tornar utilizar mai viste e sens expausar lo monde.

E me pensèri qu’aqueles robòts, bugadièrs, canhasses o umanoïds, comandats a distància, èran, per securizar, plan mai aisits que lo «karcher» d’un còp èra, que necessita una persona per lo tenir.

tornar a la lista