Los estrangièrs de l’espital

Lo Brahimà, un infirmièr malian en França dempuèi vint ans, s’es vist refusar la naturalizacion francesa, al motiu que trabalhava tròp. Emplegat en CDI dins un espital privat e a mièg temps dins un ostal de santat, lo Brahimà assegura 60 oras per setmana, lo plafon estant de 48 oras.

- Ambe la crisi, fasèm fòrca oras, sèm sollicitats dins totes los servicis, subretot a las urgéncias e puèi en ranimacion, declarèt dins una entrevista.

- Tè, çò diguèt lo Guston en escotant las informacions, d’unes dison que los estrangièrs venon en França pas que per fenhantejar e profitar de la nòstra proteccion sociala, aquel trabalhariá tròp e, del còp, d’unes pensaràn que fa partida dels que nos venon panar lo nòstre pan !

Los jornalistas fasián remarcar que la Ministra delegada a la Ciutadanetat aviá promés de abrivar la naturalizacion dels estrangièrs en primièra renga. Mas, al 22 de decembre de 2020, sus 2890 demandas, pas que 74 èran estadas obtengudas e 693 en passa de l’obténer. Contunhavan en disent qu’èran entre 4000 e 5000 mètges e sonhants dins los espitals, sovent en primièra renga mas en situacion precària e sospagats. «Los servicis criticas, aurián pas pogut foncionar, sens los «PADUES» (Praticiens à Diplôme Hors Union Européenne), en periòde de pandemia, coma aviá declarat una ginecològa obstetriciana argeriana, ela meteissa concernida.

E li tornèt, al Guston, la peçòta del paure Fernand Raynaud que contava l’istòria d’aquel estrangièr, que, dins lo vilatge, li reprochavan d’èsser vengut panar lo pan dels Franceses ; lo jorn que n’agèt un sadol se’n anguèt. E tot lo vilatge manquèt de pan : l’estrangièr èra lo fornièr !

-Baste que los sonhants estrangièrs fagan pas coma lo fornièr de la peçòta, se pensèt, seriam bravament dins la panada !

tornar a la lista