En Òc sioplèt!



Année

las annadas de publicacion seguisson
lo ritme escolari de setembre a setembre
Annada 2022
Annada 2021
Annada 2020
Annada 2019

Audio


Cossi legir l'occitan?
Comment lire l'occitan ?

Lo bloquièr de Matinhon

La nauça dels prètzes de l’energia -pel gas nauça de 57 % dempuèi lo mes de genièr-, comença de far venir a l’intrada de l’ivèrn, las tres susors al paure monde. Mas promés-jurat, nos afortís lo nòstre Primièr Ministre, la nauça de 12,7 % de divendres passat serà la darrièra… dincas a las eleccions del mes de Abrial.

En efècte, davant aquela flambada, lo nòstre Chivalièr de Matinhon bota en plaça un bloquièr tarifari que nos deuriá aparar tot l’ivèrn de las aumentacions. Çaquelà, un bloquièr apara pas de las pèiras e de las sagetas ja tiradas, coma servís pas a res de levar lo pont levadís quand l’enemic es ja dins las muralhas. E es a se demandar se nos enganam pas e se aquel bloquièr es non pas per que los Chivalièrs aparen los pacans e la pedonalha mas a la revèrs per que los Chivalièrs s’aparen d’eles e de la siá colèra.

O benlèu que nos enganam encara mai e que lo bloquièr del Chivalièr de Matinhon es pas un simplòt escut, mas un bocin d’un pavés gigant, que fargat tròces a tròces serà acabat en Abrial. Aquel pavés portat pels sius soldats de pè venguts pavesièrs, servirà a passejar en Abrial lo nòstre President, coma èra la costuma del temps dels Reis francs.

Mas d’aver de bons e leials pavesièrs, espatluts e biaissuts sufís pas : cal que lo pavés siá de bona factura, que la matièra ne siá pas de farlabica, que l’aliatge de totes los compausants ne siá esprovat, per s’estalviar que s’escule e que lo nòstre President s’espatarre. 

tornar a la lista retour