Lectura en campanha

Lo President que se vòl pas mesclar de las eleccions cantonalas e regionalas entreprenguèt çaquelà lo 17 de junh un viatge dins la region dels Nauts de França, mas sens voler «tocar pas res dels subjèctes regionals», coma afortiguèt. E aquel desplaçament foguèt consacrat a l’educacion, a la lectura e a la lenga francesa ambe la visita d’una escòla, del castèl de Villers-Cotterêts e de l’ostal mairal de La Fontaine a Château-Thierry.

Al cors d’aquel viatge, proclamèt que voliá far de la lectura «una granda causa nacionala, de l’estiu de 2021 al de 2022, e qu’aviá «l’ambicion de la botar al còr de la vida de totes los Franceses», la volontat de «portar una politica linguistica volontarista de lucha contra l’illetrisme e de promocion de la francofonia». Faguèt remarcar que la lectura èra «una de las basas de ciutadanetat, que permetriá de desvelopar la capacitat d’emancipacion, de se religar als autres e de crear una comunautat nacionala a travèrs valors comunas». E vertat que lo ciutadan, per se fargar una opinion, deu èsser capable de legir las professions de fe dels candidats, quand las recep!

Aquel desplaçament, foguèt pel president, l’ocasion de celebrar a Château-Tierry, los 400 ans de la naissença de La Fontaine, çaquelà nascut lo 8 de julhet de 1621. Aital, aquela ceremonia foguèt avançada lo 17 de Junh, just abans las eleccions, coma ac remarquèron las marridas lengas. Mas, d’aprèp la supersticion, celebrar un anniversari abans l’ora, fariá venir lo malastre. Rai, me diretz, La Fontaine, defuntat dempuèi 326 ans, se’n trufa. Mas, se l’anticipacion fasiá venir lo malastre non pas sul festejat, mas sus los que lo festejan? Aquel bolegadís del calendièr explicariá pas la mèrca del partit de la majoritat al primièr torn de las eleccions?

tornar a la lista