En Òc sioplèt!



Année

las annadas de publicacion seguisson
lo ritme escolari de setembre a setembre
Annada 2022
Annada 2021
Annada 2020
Annada 2019

Audio


Cossi legir l'occitan?
Comment lire l'occitan ?

L’art d’estropar

Lo 12 de setembre, ja a l’alba, una còla d’obrièrs assaltavan l’Arc de Trionf de la plaça de l’Estela a París, ambe còrdas e tela per l’empaquetar.

Aquela òbra, projècte dels artistas Joana-Claudi e Cristò desapareguts, e realizada pel Vladimir Yavachev, lo siu nebot, lo public la poirà remirar del 18 de Setembre al 3 de Octobre. « Lo monde passan de còsta sens véser lo monument, e l’empaquetar, çò disiá l’artista, serà un biais de lo far descobrir. L’empaquetatge farà d’el un objècte viu que se va animar dins lo vent e la susfàcia ne vendrà sensuala. Balharà al public l’enveja de lo tocar ». Per aquel paquetàs gigant fan mestièr 25000 m2 de teissut blavenc reciclable e 3000 m de còrda roja.

« Un formidable present als Parisencs e al pòble de França », s’exclamèt la Ministra de la Cultura.

Al moment que los primièrs rotlèus d’estòfa èran tenduts al dessús del monument parisenc, doas femnas, l’una a Roan, l’autra a Frejús, aprèp una semenilha d’autras e d’autres, entemenavan elas tanben l’estrop del siu «present als Franceses», lo siu programa a las eleccions presidencialas venentas. Òbra d’art autant passadissa coma l’empaquetatge del monument de París, e autan delicada de realizar : los revèrts del teissut blus, roges, ròses, verds o puslèu mirgalhats devon atraire l’agach, la textura ne deu èsser la promessa d’una alisada, los plecs devon pas que suggerir fòrmas cambiadissas, e arredondir los angles.

Pel Cristò, l’òbra d’art que tot lo monde coneis, l’estrop ne fa una novèla. Mas, dins una eleccion l’estrop es a el tot solet l’òbra d’art : rai del contengut estropat. Aital, aprèp las eleccions, qué que siá la valor artistica de l’estrop, quand lo paquet es espançat, nos podèm avisar qu’es vuide o que conten pas qu’un cascavèl.  

tornar a la lista retour