La pensada positiva

Dins la primièra mitat del sègle XX, lo doctor Coué botèt al punt un metòde d’auto-persuasion que se poiriá resumir d’aquesta frasa : « tot va pel melhor dins lo melhor dels mondes possibles. »

Aquel metòde foguèt imaginat en primièr dins una amira terapeutica, per una bona santat psiquica e fisica, e un desvelopament personal. Semblariá que se posquèsse tanben utilizar en politica. Aital, d’unes son a nos dire que se nos sentissèm pas uroses es non pas perque sèm dins una marrida passa mas perque nos focalizam sus las causas que van mal e que remarcam pas las que van plan. Nos avisam pas que la situacion economica es bona, que la creissença torna partir, que lo P.I.B. es en nauça, que lo C.A.C.40 se pòrta plan, que lo caumatge es a diminuir, que lo nòstre poder de crompar aumenta, perque demoram tafurats per la nòstra situacion d’aucèl sus la branca prèsta de petar, pel nòstre compte en banca agotat a la fin del mes, pel pagament del loguièr o dels crèdits e la dificultat de se poder emplenar lo carreton al supermercat.

Poiriam, deuriam, èsser uroses, e nos gastam la benaürança per de pensadas negativas. E pr’aquò, los politics s’i fan per de bon en nos balhant lo bon exemple. S’an de dobtes sus los resultats d’una eleccion venenta, anóncian la mesa en plaça d’un autre biais de comentar e d’analisar los resultats : los territòris rurals que riscarián de s’escartar de la bona dralha serián pas preses en compte al nivèl nacional. Aital, se la majoritat se perdián las eleccions, en plaça de romiar negativament la desfacha poirián dire positivament qu’an ganhat dins las grandas vilas !

Mas se los estudis mòstran que la pensada positiva es associada a una melhora santat, a la proesa, a la capitada, es a una condicion : la d’i creire, d’i poder creire per de bon.

tornar a la lista