En Òc sioplèt!



Année

las annadas de publicacion seguisson
lo ritme escolari de setembre a setembre
Annada 2023
Annada 2022
Annada 2021
Annada 2020
Annada 2019

Audio


Cossi legir l'occitan?
Comment lire l'occitan ?

A l'attention de ceux qui auraient envie d'apprendre a lire l'occitan correctement, je conseille de suivre la petite méthode d'Andrieu Lagarde que vous trouverez ici : http://lo-luquet-occitan.fr/?legir



En aquesta debuta de Mai...

Los prumièrs jorns de Mai son rics en commemoracions e celebracions, que se mesclan e se trucan a ne far pèrdre lo cap als nòstres bailejaires.

Aital lo nòstre president deguèt celebrar – perdon commemorar -, lo 5 de mai, lo bicentenari de la mòrt de Napoleon Bonaparte - perdon de Napoleon -.

Mas lo 10 deguèt commemorar – perdon celebrar – «la jornada nacionala de las memòrias del comèrci dels esclaus, de l’esclavitud e de la siá abolicion», jorn anniversari del vòte de la lei «Taubira» del 1O de mai de 2001, que reconeissiá en l’esclavitud un crimi contra l’umanitat. Lo nòstre President commemorèt e celebrèt gaireben «en meteis temps», l’òme que tornèt establir l’esclavitud, e la lei memoriala que la condemna.

Entre temps, lo 8, aviá celebrat la victòria de 1945 que marquèt la fin de la temptativa d’una Euròpa nazi, e l’endeman la declaracion de Robèrt Schuman del 9 de mai de 1950, fondatritz de la comunautat europenca bastida sus la cooperacion, la patz e la prosperitat.

Tornem a Napoleon, que, el tanben, bastiguèt, lo primièr aprèp Carlesmanhe, a la baioneta e al canon, un empèri, afortit de territòris anexats, d’estats vassals, e d’autres «aligats», que cobrissiá gaireben Euròpa tota. La motivacion primièra anonciada, exportar la Revolucion francesa, desliurar los pòbles de la tirania, los tirar de l’escurantisme, lèu lèu se revelèt la masqueta d’una entrepresa de conquista. E la dominacion francesa foguèt lo levat dels nacionalismes que menèron a las guèrras que seguiguèron e a la mapa politica de l’Euròpa d’uèi.

Totas aquelas celebracions ne faguèron doblidar d’autras que s’aurián, pr’aquò, pogut tenir mai aisidament, ambe mens de risques politics, coma lo 4, la jornada internacionala dels pompièrs, o encara lo 2, la jornada internacionala del jardinatge nud..

tornar a la lista retour