Cosina de campanha

Lo director general delegat de IPSOS França, Brice Teinturier, declarèt sus France Inter, en parlant de la presidenciala, « Es una campanha Tefal, aquò arrapa pas. Tot lisa alprèp dels Franceses».

Aquela metafòra de far de la campanha de la presidenciala una padena anti-adesiva foguèt jutjada plan pertinenta e saludèron l’umor de l’autor. Aquò dich, se analisam la metafòra, nos avisam qu’es pas lo recipient qu’es anti-adesiu, mas lo fricòt que cosinejan. Acorcit de formulacion que pòt menar a una error e que podèm corregir en disent, coma s’èra una recèpta, es «de cosina Tefal», valent a dire cosina preparada dins una padena Tefal, lo fricòt que s’arrapa pas estant los prepaus de la campanha, e la padena lo còs electoral.

D’unes poirián s’ofensar d’aquela comparason que un(a) «padena» designa una persona que i a mancat qualques jorns de clocada. Aital seriam 47,9 milions de padenas o una padena giganta que dedins i lisan, sens s’arrapar, los arguments e proposicions dels candidats. Plan abans la tròba del «teflon», per que lo fricòt s’arrape pas o que se rume pas, dins la padena ordinària, pausada al dessús del fuòc de lenha, per qu’aquela pòsca plan charritar, l’onchàvem plan coma cal de graissa, de lard o d’òli -o de burre-, e per fialar la metafòra del Tinturier, seriam onchats de rason e d’esperit critic, de tal biais que las asenadas nos lisarián dessús.

Mas la capitada de la padenada depend pas unicament del revestiment de la padena ni de la matièra que l’a onchada. Depend tanben de l’adreça del que i ten la coeta e que entreten lo fuòc.

De tot biais, d’aicí la fin de la campanha, benlèu que cambiaràn lo mode de cosinejar, que renonciaràn a la padenada per causir la grasilhada, lo rostit o lo bulhit e aital de «padena» l’electorat vendriá «topina».

tornar a la lista