Un complòt de la bragueta ?

Lo Guston, per anar al borg, reglar un pichòt afar a la banca, s’èra quitat los vestits de trabalh per se cargar una camiseta e un parelh de cauças candas. Abans de dintrar a la banca decidiguèt d’anar als comuns escampar d’aiga, que l’espèra, òm sap pas, podiá èsser longueta. Mas quand se volguèt tornar braguetar, lo cursor de la zimpeta desralhèt e lo Guston deguèt caminar dins la carrièra, la botica alandada. Aviá pas léser de se’n tornar a l’ostal per se cambiar de cauças, que se seriá mancat lo rendètz-vos. Se resignèt doncas a se presentar desbraguetat davant lo director de l’agéncia. Mas aital èra pas al siu avantatge per negociar una autorizacion de descobèrt !

Pr’aquò, soscava lo Guston, aquelas cauças èran gaireben nòvas, lavadas pas qu’un còp ! Vertat, las aviá pas pagadas car, qu’èran en sòldas e que venián d’Asia, aviá legit sus l’etiqueta. Mas perqué una tala marrida qualitat del producte ? La cèrca del mendre còst de produccion? Segur. Mas se s’i ajustava una volontat de portar tòrt ? Aqueles países, fornisseires de l’Occident, òc-ben, mas de còps que i a gaireben en guèrra ambe el, se poirián servir de cremalhièiras de marrida qualitat per lo destabilizar. En efècte, un cap d’estat o de governament que se sietariá a la taula d’una conferéncia al som desbraguetat, i perdriá tota autoritat, e lo prestigi del siu país ne patiriá bravament.

Mas s’es aquò los Asiatics s’enganan d’estrategia : los òmes politics dels nòstres países son a l’abric d’una bragueta que se crinca. Per se vestir fan pas las sòldas e se pòdon pagar de costumes costoses, a la bragueta segura. De mai, de còps que i a , per los aparar, de benfaitors lor fan present de costumes a mai de 30000 euros lo parelh, que lor estàlvian lo pensament de la bragueta que lasca.

tornar a la lista