En Òc sioplèt!



Année

las annadas de publicacion seguisson
lo ritme escolari de setembre a setembre
Annada 2023
Annada 2022
Annada 2021
Annada 2020
Annada 2019

Audio


Cossi legir l'occitan?
Comment lire l'occitan ?

A l'attention de ceux qui auraient envie d'apprendre a lire l'occitan correctement, je conseille de suivre la petite méthode d'Andrieu Lagarde que vous trouverez ici : http://lo-luquet-occitan.fr/?legir



Bona annada

Dins l’ancian temps, un còp èra desiràvem la bona annada, la benaürança e la santat. La benaürança, èra una annada que la recòlta, èra sufisenta per emplenar lo granièr e noirir lo brave monde. A’n aquela epòca lo prètz del trabalh se mesurava a la quantitat del pan que se podiá crompar ambe lo salari d’una jornada. E la benaürança èra quand lo pòble podiá manjar a la siá talent, se vestir, s’aparar de la fred, se sonhar en cas de malautiá.

Ara, a la nòstra epòca, dins lo monde novèl, l’economia es venguda una sciéncia, Se parla d’ara endavant del poder de crompar, e viure e èsser urós es aver lo poder de crompar ; e los nòstres menaires, atentius a la nòstra benaürança, nos dison que son totjorn a soscar coma se pòt aumentar lo nòstre poder de crompar.

N’i a encara que pòdon pas crompar, que son pas pron poderoses ? Aquò rai. Sèm en camin cap al progrès, e la riquesa d’amont naut rajarà cap aval. Es pas qu’una question de paciéncia. En mai d’aquò, per aumentar lo nòstre poder de crompar avèm l’assisténcia e l’ajuda de las bancas e dels crèdits que tornan tanlèu acabats. Puèi, naissèm totes capitalistas, los mai pichons coma los mai grands : aquel capital que ne dispausam tre la naissença es la santat.

Çaquelà, se aquel capital-santat nos pòt ajudar a aumentar lo nòstre poder de crompar, de còps que i a, lo nòstre poder de crompar es pas sufisent per salvagardar lo nòstre capital-santat, o pièger, los esfòrces demandats per aumentar lo poder de crompar l’arroïnan !

Tanben, sul solhet de l’an novèl, vos desirarai, non pas una aumentacion del vòstre poder de crompar mas puslèu, coma un còp èra, una bona annada plan granada e acompanhada de mai d’autras, una annada que cadun i posque viure dins la dignitat, dins una societat frairala, e respectuosa de l’autre.

tornar a la lista retour