Amagar lo Pecat

Aprèp lo Ministre de l’Educacion nacionala l’an passat, lo nòstre president, dins una entrevista a «Elle», tornèt sus la camiseta corteta o naut acorchit -cropped tops o crop top en francés- en declarant qu’es per «una tenguda decenta exigida» al licèu.

Aquel vestit, li respond una jornalista, es pas una pèça cargada ideologicament o simbolicament, que descapèla, entre dus atributs sexuals, un endreit cast, lo monilh. Òm balha a un vestit una valor morala que far de la gojata una verge o una puta.

Caçats de l’Òrt d’Eden, l’òme e la femna, deguèron s’amagar las partidas vergonhosas que, puèi, del pubís s’espandiguèron a tot lo còs, subretot per la femna que deviá quitament pas portar vestits que suggerisson las fòrmas, e se capelar lo pel. Dins l’Occident judeo-crestian, a l’epòca contemporanèa, la femna, de mai en mai mèstra del siu còs, a fait tombar los interdits, mentre que dins d’autres países d’autras religions los an gardats e de còps que i a afortits.

Lo Guston, qu’ausiguèt micas d’aquela polemica compreniá pas plan cossí volián, a l’encòp, descapelar las femnas tròp capeladas e tornar capelar las que s’expausavan lo monilh.

- Son jovenòtas, òc ben, disiá al vesin, mas son ensenhadas per las maires que vòlon pas ne far ni de monjas ni de putas! E puèi, al moment que nos remenan que sèm a un punt que se jòga la subrevida de l’umanitat, amenaçada pel rescalfament climatic, e que la pandemia fa mina de tornar partir, me sembla que lo monilh fa pas partida dels problèmas primièrs que’n deu s’ocupar un President!

-T’enganas, li respondèt lo vesin : se lo monilh es lo Mal, lo Pecat, es una ofensa al Cèl que nos castiga en nos aclapant d’aquelas plagas.

- Doncas tornar perlongar la camiseta fa partida de las mesuras sanitàrias e de la transicion ecologica?

tornar a la lista