las annadas de publicacion seguissonlo ritme escolari de setembre a setembre Annada 2023Annada 2022Annada 2021Annada 2020Annada 2019
Cossi legir l'occitan?
Comment lire l'occitan ?
A l'attention de ceux qui auraient envie d'apprendre a lire l'occitan correctement, je conseille de suivre la petite méthode d'Andrieu Lagarde que vous trouverez ici : http://lo-luquet-occitan.fr/?legir
Quand èri drollet e que foguèri pro grand per caminar tot solet sus la rota, me diguèron a l’ostal que caliá totjorn caminar a dreita, que siá a pè o en bicicleta.
- « Es obligatòri ; tot lo monde caminan a dreita e demòran plan a dreita ; se caminas a esquèrra, te faràs espotir. »
Çaquelà, a l’escòla, lo mèstre nos disiá que, se en bicicleta caliá tenir la dreita, a pè, caliá caminar a esquèrra, e de nos explicar, esquèmas al tablèu per afortir, que, a esquèrra, èrem facia al dangièr, e que se un fadòrla nos arribava dessús, nos podiam salvar en sautant dins lo valat, non pas que a dreita, l’aviam dins l’esquina, lo vesiam pas e nos fasiam espotir.
Anavi en bicicleta a l’escòla. Mas quand èri a pè, qui deviái escotar ? Qué deviái causir ? L’esquèrra o la dreita ?
-Rai, me diguèt lo papà, çò que compta es de plan demorar sarrat, d’un costat o de l’autre e de pas demorar al mitan de la rota, o çò pièjer de se passejar d’un costat de l’autre.
Aquò me tornèt l’autre jorn que vesèri a l’intrada de la vila un òme que ziga-zaguejava e tresplombava al mitan de la rota, una encambada a dreita, de quora en quora una pichona a esquèrra, en bracejant e marmolejant, coma s’ensajava de caminar a l’encòp a dreita e a esquèrra, sens se tenir ni a dreita ni a esquèrra, e en se trufant dels automobilistas que repotegavan e qu’amenaçavan de l’espotir.