Actualitat en discors

La màger part del temps, lo biais de presentar l’actualitat dins lo bulletins d’informacion es simplòt: una enumeracion dels eveniments màgers, dins un òrdre d’importància del mai bèl al mai menut, plan segur segond lo vejaire del jornalista. Aital, sovent nos desgrunan un capelet d’eveniments sens ligam los uns ambe los autres, e quitament, de còps que i a, que se trucan o se copan.

Es l’impression qu’aguèri, aquel matin, quand, en dejunant, ausiguèri lo bulletin d’informacion de uèit oras. I èran enumerats en primièr la progression del covit, lo pòrt de la masqueta, las incertituds de la dintrada, lo plan de relança de l’economia. Seguissián lo rendut compte de la conferéncia de premsa de la conse de Marselha, acompanhada de la presidenta de la metropòli e del professor Raoult, e lo punt sus las universitats d’estiu e la dintrada dels partits politics. En tresen reportavan una iniciativa per contenir la marèia negra dins lo gòlf del Mexic : amassar tot lo pel que se copa a San Francisco, New-York e Chicago per n’emplenar debàsses de nilon e ne constituir una restanca que se beuriá lo petròli que s’escampa.

Vesiái pas gaire de ligams entre aqueles sicuts. Mas tot s’esclairèt quand, lo bulletin clavat, ausiguèri la reclama que seguiguèt : un laboratòri prepausava un producte per arrestar la casuda del pel e mai per lo tornar far créisser. E aital lo bulletin d’informacion deveniá un discors bastit, estructurat, una bastison intellectuala segura, un rasonament en tres punts clarinèl coma l’aiga de la font : se la crisi sanitària e economica vos fa pèrdre lo pel, o se lo vos desrabatz de desesper, podètz, en lo reculhissent participar al salvament de la planeta, e pas la pena de lo vos copar en quatre que lo laboratòri R... F... vos tornarà la vòstra cabeladura.

tornar a la lista