En Òc sioplèt!



Année

las annadas de publicacion seguisson
lo ritme escolari de setembre a setembre
Annada 2022
Annada 2021
Annada 2020
Annada 2019

Audio


Cossi legir l'occitan?
Comment lire l'occitan ?

Los desviaments de l’empatia

Legissiái l’article d’un jornalista que s’interrogava suls dangièrs de l’empatia dels èssers umans pels robòts. Dins una experiéncia avián mesurat l’activitat cerebrala d’umans espectators d’una scèna de violéncia sus un uman, sus un robòt e sus un objècte. S’avisèron que l’uman èra sensible a la violéncia faita a l’uman coma a la faita a un robòt, mas a un mendre gras. E lo jornalista de conclure qu’èrem pas a nos pèrdre a fèt la nòstra umanitat.

En contunhant de me passejar sus la tela sautèri sus un autre article que parlava dels darrièrs eveniments en Afganistan. Reportavan que los Britanics, lo 28 d’agost, avián evacuat lo P. Farthing, responsable de l’associacion Nowzord, ambe 200 canhs e gats, dempuèi un refugi de Quabol, mentre que de centenats d’Afgans, candidats a la partença demoravan sus plaça. Lo Secretari d’Estat a la Defensa britanic aviá plan anonciat qu’anava pas « balhar la prioritat a las bèstias suls òmes, femnas e mainatges desesperats que tustan a la pòrta  ». Mas jos la quichada dels militants de la causa de las bèstias e del capuditge del Farting se deguèt plegar, e li balhar un espaci pel siu avion e las siás bèstias. E lo Farting pugèt dins l’avion ambe canhs e gats, en abandonant lo quite personal afgan de l’associacion.

En legissent unas reaccions de legeires que seguissián: « m’estimi melhor aculhir un canh o un gat puslèu qu’un Taliban desguisat..., los umans se pòdon defendre, las bèstias non..., plan bona iniciativa, per un còp que nos mainam de las bèstias... », me demandèri se las conclusions de l’estudi de l’empatia pels robòts devián pas èsser revisadas : se i aviá agut sul aeropòrt de Quabol de robòts qu’esperèsson, quines de las bèstias, dels èssers de metal e d’electronica o dels umans serián estats prioritaris ?

tornar a la lista retour